بقلم : عماد الدين العيطة ( تم نشر المقال سابقا في 22 اكتوبر 2020)
•• فى عنبر العقلاء .. شات
وستتات عايزة تتعرف على راجل رزيل بيخرف ، ومتدارى جوه ف الحارة ، واقف من ورا ستارة وأمارة إنه بيتصرف .. ويالاااه يا حلوة بينا نتعرف ، إسمك إيه ؟ .. م البساتين ، طب ساكن فين ؟ .. جو ه حسين ، هو إنت مخرف ؟ .. لااا باتعرف ، نفسى ف شاى بالياسمين
•• فى عنبر العقلاء .. ضايعين
وف سكة زمااان راجعين للمراهقة المتأخرة ، وشوية مسخرة رجعتهم ١٠٠ سنة ورا .. يالاااه بقى ما اللى جرى جرى ، أخدنا إيه م المنظرة ، ماإحنا بقالنا سنين وسنين ملتزمين وسنين وسنين محتارين بين نارين ومحرومين والحب شمال ، وإحنا يمين مش عارفين سهرانين وإلااا نايمين ، طب نحكى لمين واللى معانا قفلوا ودانهم .. تاه عنوانهم راحوا وعملوا ليهم أصحاب وقبل مايمشوا قفلوا الباب وإحنااا بره الباب تايهين جوانا حنين ومش طايقين نقضى بواقى العمر أنين
•• فى عنبر العقلاء .. القاضية
وحوار ع السوشيال ميديا مجنون بيحب سريديا ومعاها علبة ساردين ، جوزك فين ؟ .. ف الحمام ، وإنت مراتك ؟ نايمة وتايهة ف الأحلام و الأوهام ، طب بص واراك بس بسكون تلقى مراتك يامجنون ماسكة الهون هاتدق دماغك والتليفون وتلف فضيحتك كل الكون وهتديك الضربة القاضية أما أنا فاضية هادور تانى على ناس حاضرة ، ما إنت ياعم مجرد فكرة وبقيت ذكرى
